--------------------------------------------------------------------------------
八十年代初.....
添叔(假名)係一個地盤工人, 佢果時o係中環半山一個地盤工作,由於地盤趕工,佢同一班工人都要開夜, 開完工, 多數會同d其他工人一齊搭的士落去.
有一晚, 因佢自己有d手尾要攪埋佢,所以冇同其他同事一齊走, 結果果晚佢做到連飯都冇,食仲成三點至走....
果晚搵架的士都冇,結果等o左一陣,佢頂唔順,心諗落番中環都唔遠路,結果就行落去.....

佢由忌連拿利落去, 個五臟廟響過不停, 至諗起自己未食飯, 即刻拿拿林加快步速, 諗住落到去搵間『七仔』醫下個肚.....

當佢行到雲咸街同下亞厘畢道交界, 見到燈光通明, 飄煙四散, 一陣濃烈的肉香飄至鼻度,本來已睡眼惺忪的添叔,立時精神百倍, 伸個頭去超超......嘩! 平時呢個時間應該水靜河飛o既半山區, 竟然有當牛雜檔.... 而且仲擺o左幾張檯o係度, 坐滿晒人, 個個仲好專心咁食, 個樣仲鬼咁滋味添....

結果添叔行埋去....見到個檔主條眉好鬼死幼, 條眼又好鬼死細, 望埋去幾乎好似得兩點咁, 相當奇怪,呀...仲有仲有, 佢剪d牛雜果陣, 好似我地o係小學勞作堂剪紙條咁斯文, 一絲不苟咁, 仲好似好欣賞自己剪 d 牛雜咁, 完全唔係我地平時見o個 d 又大份, 咬住枝煙, 個樣又惡又衰, 仲有紋身果亭牛雜佬咁.

o係牛雜車後面有棵樹, 樹後面有個女人坐o係地下, 狀似 o係度洗緊牛雜, 阿添叔當時亦冇理咁多, 於同阿檔主講]為太肚餓, 未睇清楚就放入袋....

未幾, 個檔主終於剪完碗牛雜, 遞俾阿添叔, 添叔立刻以一貫地盤佬作風, 捧著碗牛雜搵位坐去也..... 話說阿添叔餓狗搶x 咁拿住碗牛雜, 去霸個靚位, 佢一坐低, 就食七咁食d 牛雜, 全不為意佢身邊o既食客為乜水, 食到咁上下, 佢至開始望下週圍 d 人, 個個都面青口唇白, 好似病緊咁, 但又好靜默咁食佢地o的o野, 突然佢望到同檯佪阿伯同d細路, o係度食緊『腸仔麵』, 阿添叔望下自己碗牛雜, 已經風捲殘雲o勒, 佢就多口問句:

"咦! 阿伯, 你地o的公仔麵o係邊度買, 我唔多覺眼o既..."

個阿伯同 d 細路好奇怪咁互相對望一眼, 然後齊齊望住阿添叔, d 眼神十足十牛雜檔主咁陰森, 然後阿伯冇出聲, 佢向棵樹後面個女人度指o左一指, 添叔立刻唔理三七二十一, 急不及待咁飛身行過去諗住『補飛』去也,.

點知一行到去, 就望到個女人.....佢好似"楂"住一隻人o既腳, o係度劈開個人個肚.....而添叔又望到個女人後邊.... ....一個個人o既屍體, 堆積如山, 佢地個肚個個都比人割開, 添叔諗起剛剛佢自己食果d o野, 一陣噁心, 悶氣從胃部攻上, 立時嘔吐起來....然後佢岳高個頭望望頭先食 o野果度, 個個食客人蹤杳然, 佢行去望望頭先阿伯佢地食o個碗『腸仔麵』......只發現o個 d 並唔係什麼『腸仔麵』,而係成碗一條條活生生o既屍蟲(蛆蟲).....

當佢o既呼叫聲正從喉嚨想嗌出時...突然背後有隻手o係佢膊頭拍o左一拍, 佢好驚慌咁向後望一望, 係...... o個個牛雜檔主, 仲有果班『食客』....佢地個個用果種好陰森o既眼神望住添叔...o係度狂笑, 笑得好猙獰, 好淒厲, o係咁話:

「老友, 俾返 d 內臟我地, 你食o左我地 d 內臟呀....」

自此, 冇人再見到添叔, 亦冇人知佢下落......可能, 當你半夜三點鐘, 行過下亞厘畢道同雲咸街交界, 可能會見到佢o係度食緊牛雜....