人肉分家


時間：去年聖誕節‧地點：元朗朋友家‧人物：阿芬

人o地可能覺得我壞，但係我有自己o既生活方式。我讀中三，不過已經半年冇返學，阿媽都唔理得我咁多。有時我又怕佢煩，所以成日去朋友屋企度住。佢住元朗，屋企人成日返大陸做生意，都唔多返o黎，所以間屋成日得我兩個。我成日研究扮靚心得。

呢件事發生o係去年聖誕節，我諗住搵班朋友返o黎開化裝舞會。順便識男仔，因為有人會帶佢男友o既朋友，大家玩一晚，好易拍拖。

晚大約係下午五點幾，我沖涼，由於怕凍，所以關上窗，不過沖涼時已經見到窗口有黑影走過，我即刻諗起變態佬，就大聲叫死黨出門口睇有冇人。佢去o左好耐，我已經著返衫走出o黎。不過我都冇為意佢有冇返入o黎。

我坐o係佢阿媽張化妝前，準備化妝，但係化化竟然見到鏡入便，即係我後面，出現一個背影。個背影係我自己，同我著埋同一件衫，我好驚，唔敢叫。心入便即刻唸經，但係又諗日光日白，可能係自己眼花，所以我開始叫死黨個名。

我叫o左幾聲，佢走入o黎，但係竟然係同我個背影講o野，我嚇到腳都震，盡力大叫，又用張被蓋頭，冇耐死黨同我講：「你做乜？」我隔o左好耐先敢拉開張被。同佢講正話見到o既o野，佢最初唔信（因為我成日扮鬼嚇人），後來見我驚到臉都青，即刻叫我收口唔好講。

晚，成班朋友玩，我唔敢走開一步。亦唔敢入廁所，到天光，我同死黨講話要返屋企，佢話：『你走我同你一齊走。』上到巴士佢先同我講：「其實我細個時都見過自己o係自己身後行過。」

李終貴按：你o既事蹟好神奇，到底你見到o既係人定係靈魂？如果你見到係靈魂，點解你同朋友都可以靈魂離開肉身？如果你見到係人，仲恐怖，咁寫信o黎o既人，到底係人定係鬼？