電視城內經常傳出鬼怪疑雲，究竟係工作人員捱更抵夜，因而產生幻覺，抑或真有其事？咁就真係你唔知，我唔知，只有天至知喇！

慘做「笑聲怪客」替死鬼－魏駿傑
　好多年前，我同林文龍、鄭伊健o係八廠拍劇，當拍到我同伊健的對手戲時，我依足劇本去做，講完對白之後行o左出布景板外，剩低伊健一個做內心戲，但點知當我o係布景板外靜心等候時，竟然全部人都聽到有『人』發出笑聲，導演即時叫cut，仲鬧我做乜笑，我同導演講，我冇笑到，亦都唔會咁冇演員道德，之後大家睇番playback，竟發現冇錄到任何笑聲，o個陣導演先識驚，其實之前我已經聽過好多前輩話呢間廠經常有怪聲出現，所以大家都見怪不怪！

被困錄影廠半個鐘－羅嘉良
　多年前我在電視城二廠拍攝劇集《誓不低頭》時，由於太疲倦的關係，晚飯時間其他演員紛紛往吃飯，只剩下我一人留在錄影廠內睡覺。當我醒來但還未睜開眼時，聽到很多人聲，更感覺有人開燈，我以為是其他演員吃完飯回來，但我漸漸覺得有點不對勁。我覺得那班人一直圍著我床邊行，甚至感覺到他們穿過布景。我心知不妙，立即衝向門口，可是廠房的大門開極也開不到，當時我驚到縮在門邊，足足過了半小時才能將大門打開，自此之後，我再不敢獨個兒留在任何錄影廠呢！

鍾保羅現身錄影廠－羅君左
　呢件事發生o係好多年前，當時我o係五廠拍《天龍八部》，放break o既時候，所有工作人員都出晒去，只餘下我同陳浩民等演員o係度對稿，對對o下，我驟眼見到有人企o係錄影機（按：應為〝攝影機〞）後面，最初我以為有工作人員未出去，咪諗住望o下係邊個囉！點知正面一望又冇人喎！不過我好肯定唔會睇錯，所以偷偷o地斜眼視，諗住睇清楚，果然真係望到有個著灰色西裝、白恤衫、打黑呔o既男人！雖然我望唔到佢個樣，但就相信佢係鍾保羅，因為佢出殯當日都係呢身打扮！事後都有其他演員話見到，但陳浩民就話睇唔到，仲叫我唔好嚇佢添！

戲服離奇失蹤－蔡子健
　以前做兒童節目時，每星期都會指定著一套衫，基本上唔會有其他人拿o個套衫 o黎著o既。點知有一日，我摷勻成個服裝間都搵唔到套衫，問過晒所有同事都話冇拿到，服裝間阿姐知道後竟然叫我行開一陣，跟住我轉頭就聽到佢好大聲拍檯話：『唔好玩喇』當時服裝間只有佢一個人，而當我去完廁所再返入去o既時候，o個套衫已經o係檯面。事後我好奇地問佢剛才發生乜o野事，佢叫我唔好理喎！

電視城鬼故篇２
化妝間打搞「佢o地」－唐文龍
　就係o係呢個二五廠化妝間喇！記得o個朝我凌晨四、五點自收工，跟住六點又要開工，見有個多鐘時間，咪開張帆布床睏囉！因為太早o既關係，所以四廠已經冇晒人，化妝間亦只有我一個，大約睏o左十幾分鐘，我聽到腳步聲，我以為有人返o黎開工，咪諗住打聲招呼囉，點知睜開眼睛，又冇人喎！於是我又睏番，冇幾耐又聽到化妝間好嘈，於是又再睜開睇o下，點知都係冇人。我以為係錯覺，但當我再睏番o既時候，就感覺到五、六個人企o係床邊望住我，仲o係度講 o野，講o的乜我就打聽到喇！當然啦，到我張開眼時，又係乜都見唔到，o個一刻我實在太累喇！我o係個心講：『我好累，我只係想睏覺o即，如果打搞你o地 o既話，真係唔好意思。』講完之後，我再聽唔到任何聲音，亦都再冇怪事發生，自此，我便隨身攜帶呢張觀音咭護身。

廁所驚心拍門事件－陳穎妍
　o個日o係電視城二、五廠，大約凌晨三、四點左右，我自己一個去洗手間。當時裡面一個人都冇，只係隱約聽到水滴聲，我都感覺到唔係好舒服o架啦！但實在真係有需要去洗手間，所以都唔理得咁多，惟有照去囉！就o係我用廁o個陣，突然感覺有人好大力拍我度門，仲拍o左兩、三次添！雖然我都驚驚o地，但就諗可能係有人整蠱我，所以大膽咁問：『出面係咪有人呀？係邊個呀？』結果不單冇人應我，當我開門之後更連人影都唔見添！o個陣我先開始驚，但為求自己心安，所以都睇埋其他廁格有冇人，點知真係冇人！於是我就急急腳離開洗手間，但我冇話俾工作人員知，反而同屋企人講，跟住佢o地就幫我求o左一道符同埋張觀音咭我，之後就再冇遇過怪事喇！

鬼仔睇拍戲－祝文君
　以前聽聞有位做幕後o既工作人員有陰陽眼，每逢o係二五廠開工拍劇前都會好大聲咁對住空氣講：『走喇！唔好阻住開工呀！』起初其他工作人員都唔知佢做乜，覺得好奇怪，後來先知，原來佢成日見到有班鬼仔坐o係收音咪桿上睇人拍戲，於是想趕佢o地走囉！不過班鬼仔就唔多聽話，次次鬧走o左之後，好快又再返o黎，完全冇佢o地辦法。平時我會戴水晶o黎辟邪、好似黑水晶咁。早前我去台灣睇舞台劇時，又買o左條內藏平安符o既鍊掛o係部車o既倒後鏡上，以保平安。

城樓上的大頭鬼－陳鍵鋒
　據聞古裝街城樓上有隻大頭鬼，聽一位資深工作人員講，佢有晚半夜收工，驟眼望見城樓上有個人影，點知睇真o的，竟發現呢個『人』個頭比平常人大三至四倍，嚇到佢立即離開，佢相信呢個就係傳聞中o既大頭鬼！